Azərbaycan yenə Naxçıvanın vurulduğunu deyir
Azərbaycan yenə Naxçıvan istiqamətində mövqelərinin vurulduğunu deyir.
Bununla bağlı Azərbaycan Müdafiə Nazirliyi (MN) avqustun 16-da səhər saatlarında məlumat yayıb.
Məlumata görə, avqustun 16-sı saat 09:30-dan etibarən Ermənistan silahlı qüvvələri mövqelərindən Naxçıvan Muxtar Respublikasının Sədərək rayonunun Heydərabad yaşayış məntəqəsi istiqamətində yerləşən Azərbaycan ordusunun mövqelərini avtomat və pulemyotlardan atəşə tutmağa başlayıb.
Açıqlamaya görə, Azərbaycan ordusunun şəxsi heyəti arasında itki yoxdur.
Bu məlumata, hələlik, Ermənistanın münasibəti bəlli deyil.
Son aylar Azərbaycanla Ermənistan arasında yenidən gərginliyin artdığı müşahidə olunur. Tez-tez xüsusilə iki ölkə arasında sərhəddə atəşkəsin pozulması ilə bağlı qarşılıqlı iddialar səslənir. Atəşkəsin pozulmasına görə onlar bir-birlərini günahlandırırlar. Hətta ölən və yaralananların olduğu da bildirilib.
MN-dən Qaragöl açıqlaması
Azərbaycan Müdafiə Nazirliyi (MN) bu gün, avqustun 16-da Ermənistanın açıqlamasına münasibət bildirib. Orada qeyd edilir ki, Ermənistan tərəfinin dövlət sərhədi istiqamətində Qaragöl ətrafında Azərbaycan ordusunun bölmələrinin guya təxribat törətməsi və bir hərbçisinin həlak olması barədə yayılan məlumat yalandır: "Qarşı tərəf bu kimi yalan məlumatlarla törədə biləcəyi diversiyalarına zəmin yaratmağa cəhd göstərir".
Snayperin erməni hərbçini vurduğu bildirilir
Ermənistanın Müdafiə Nazirliyi Azərbaycanı sərhədin Naxçıvan istiqamətində növbəti provokasiyada ittiham edir.
Qurumun bildirməsinə görə, bu gün səhər snayper atəşindən N saylı hərbi hissədən Vaan Tatosyan həlak olub. Qarşı tərəfin cavab atəşi ilə susdurulduğu bildirilir.
Azərbaycan təkzib edir
Azərbaycan Müdafiə Nazirliyi (MN) bu gün, avqustun 16-da günorta saatlarında cəbhədəki vəziyyətlə bağlı növbəti açıqlama yayıb.
Orada isə qeyd edilir ki, Naxçıvan Muxtar Respublikası istiqamətində guya Azərbaycan ordusunun bölmələrinin atəş açması nəticəsində Ermənistan hərbi qulluqçusunun həlak olması barədə qarşı tərəfinin yaydığı məlumat dezinformasiyasıdır: "Saat 09:30-dan etibarən məhz Ermənistan silahlı qüvvələri tərəfindən Sədərək rayonunun Heydərabad yaşayış məntəqəsi istiqamətində Azərbaycan ordusunun mövqeləri atəşə tutulub. Bildiririk ki, qarşı tərəfin yalan məlumatlar yaymaqda məqsədi daxildə yaranan münaqişə zəminində erməni hərbi qulluqçusunun güllələnməsi faktını ört-basdır etməkdir".
Azərbaycan Naxçıvan və Gədəbəydə mövqelərinin vurulduğunu deyir
Azərbaycan Müdafiə Nazirliyi (MN) avqustun 17-də bildirib ki, Ermənistan silahlı qüvvələri müxtəlif istiqamətlərdə mövqelərini atəşə tutub.
Açıqlamaya görə, avqustun 17-si saat 10:55-dən 14:20-dək Ermənistan silahlı qüvvələri Naxçıvan Muxtar Respublikasının Sədərək rayonunun Heydərabad yaşayış məntəqəsi istiqamətində yerləşən Azərbaycan ordusunun mövqelərinə fasilələrlə snayper tüfəngi, avtomat və pulemyotlardan atəş açıb.
Habelə qeyd edilir ki, saat 11:18-dən 13:37-dək Gədəbəy rayonunun Qalakənd və Kəlbəcər rayonunun İstisu yaşayış məntəqələri istiqamətində yerləşən Azərbaycan ordusunun mövqeləri də fasilələrlə müxtəlif çaplı silahlardan atəşə tutulub.
Açıqlamaya görə, qarşı tərəfə cavab verilib, Azərbaycan ordusunun şəxsi heyəti arasında itki yoxdur.
Bu məlumata, hələlik, qarşı tərəfin münasibəti bəlli deyil.