45 min manat
Vəkil Fariz Namazlı deyir ki, Xədicə İsmayıl təxminən 45 min manat vergi ödəməkdən yayınmaqda ittiham olunur. Jurnalist bu ittihamı rədd edir.
Məhkəmədə Xədicəyə su verilmir
Vəkillər Xədicəyə su alıb, verməyə çalışsalar da nəzarətçilər buna imkan verməyiblər. Məhkəmə işçiləri özləri də Xədicəyə su vermirlər.
«Turalın gəlməməsi müəmmalıdır»
Şahid qismində məhkəmə çağırılan jurnalist Aynur İmranova deyir ki, Xədicə İsmayıl gümrahdır, zarafatından qalmır: «Məhkəməni qərəzli qiymətləndirirəm. Tural Mustafayev şikayətini geri götürməsinə baxmayaraq, bu məsələylə bağlı maddə hələ də gündəmdə qalır. Tural bu gün məhkəməyə gəlmir, keçmiş həyat yoldaşı zəng edir, amma zəng çatmır. Onun prosesə gəlməməsi də müəmmalıdır».
Məhkəmə tərkibinə etiraz
Xədicə İsmayıl və vəkilləri məhkəmə tərkibinə etiraz ediblər. Məhkəmə heyəti etirazı dəyərləndirmək üçün prosesdə fasilə elan edib.
Xədicə İsmayıl tələb edib ki, AzadlıqRadiosunun və «Azadlıq» qəzetinin işçilərinə məhkəmədən reportaj hazırlanmasına şərait yaradılsın.
Prosesə virtual.az, teleqraf.com və apa-nın əməkdaşları buraxılıb. «Onlar Prezident Administrasiyasından gəldiyi güman edilən siyahı üzrə məhkəmə binasının əsas girişindən keçirlər. Nəzarətçilər özləri onları gəlib aparır», - müxbirlərimiz bildirir.