«Özləri kimi fərari olmayanları sevmirlər»
Əli Kərimli çıxışında deyib ki, hakimiyyət orduda işgəncə ilə əsgərləri öldürənləri, polis şöbələrində adam öldürənləri müdafiə edir.
«Qarabağ qazilərinə də divan tuturlar. Ötən ay Cəlilabada iki Qarabağ qazisi intihar etdi - biri özünü asdı, biri yandırdı. Bu hakimiyyət özləri kimi fərari olmayanları sevmirlər. Etdiklərinizə görə cavab verməli olacaqsınız».
Aksiyanın tələbləri
Təşkilatçılardan biri olan AXCP sədrinin müavini Fuad Qəhrəmanlı aksiyadan az öncə tələblərini izah edir.
«İnsanlar hökumətin acgözlüyünün qurbanı oldu»
AXCP sədri Əli Kərimli deyib ki, hökumət xalqın etimadını qazanmadığı üçün aprelin 5-dəki aksiyadan sonra hər dəfə mitinqlərin qarşısını alıb. «Maneələr bizim qarşımızı almaq üçündür. Bura toplaşan insanlar narazı insanların az bir qismidir. O gün uzaqda deyil, enerjimizi bütün Azərbaycana sirayət edəcək, «xilas ol» deyəcək».
Əli Kərimli Binəqədidə baş verən yanğınla bağlı deyib ki, həmin insanlar hökumətin acgözlüyünün qurbanı oldular: «İndi istəyirlər ki, bu dəhşətli cinayəti bir «JEK» müdirinin boynuna qoysunlar».
Bir dəqiqəlik süküt...
Mitinqdə mayın 19-da Binəqədidə baş vermiş yanğında həlak olanların, gənc fəal Nərgiz Yaqublunun, son günlər həlak olan Azərbaycan əsgərlərinin xatirəsi bir dəqiqəlik sükutla yad edilib.
Təşkilatçılar bildirib ki, «Xilas ol» mitinqi Azərbaycana qurtuluş tələb edir, bu mitinq Azərbaycana azadlıq tələbidir. Bundan sonra meydanda «Azadlıq», «İstefa», «Talana son» şüarları səsləndirilib.