Xədicənin həbsi 5-14 dekabr xronikası

Dekabr 12, 2014

Dekabrın 5-də Xədicə İsmayıl həbs olunub. Onu ittiham edirlər ki, Tural Mustafayev adlı şəxsi özünə qəsd həddinə çatdırıb. Dekabrın 6-da Xədicə İsmayılın evində axtarış aparılıb. Azad Avropa AzadlıqRadiosu korporasiyasının rəhbərliyi jurnalistin həbsinin arxasında onun peşə fəaliyyətinin durduğunu bəyan edərək, Azərbaycan prezidentinin və digər məmurların qanunsuz biznesini üzə çıxardığına görə Xədicədən qisas alındığını bildirib. Beynəlxalq ictimaiyyət də Azərbaycan hakimiyyətinin əməllərini pisləyib. Hakimiyyət nümayəndələri bu ittihamları rədd edir.

AzadlıqRadiosunun saytında Xədicə İsmayılla bağlı online forum mövcuddur. Burada onun həbsi haqda fikirlərini sən də bölüşə, Xədicəyə sual göndərə bilərsən.

_{AzadlıqRadiosu hadisələri izləyərək canlı bloqu daim yeniləyir. Ən yeni xəbərlər bloqun əvvəlində yerləşdirilir. Mətndən aşağıda göy rəngli «davamı» düyməsini basmaqla bloqu vərəqləmək, əvvəlki postlarla da tanış olmaq mümkündür.}

19:07 5.12.2014

Tural Mustafayev «Meydan TV»-yə danışıb

Xədicə İsmayıla qarşı CM-nin 125-ci maddəsi (özünüöldürmə həddinə çatdırma) ilə ittiham irəli sürülüb.

Bunu Meydan TV-yə açıqlamasında Tural Mustafayev bildirib.

Onun dediyinə görə, istintaq belə qənaətə gəlib ki, Xədicə İsmayıl onu özünü öldürmə həddinə çatdırıb.

«İstintaq araşdırma mərhələsindədir. Mən istintaq sirrinin yayılmaması ilə bağlı iltizama qol çəkmişəm. Ona görə də ifadəmlə bağlı heç nə deyə bilmərəm. İstintaq yekunlaşdıqdan sonra mətbuata açıqlama verəcəyəm» - deyə Tural Mustafayev bildirib.

16:18 5.12.2014

Məhkəmə müşavirəyə yollanıb

Bir azdan qərar açıqlanacaq. Bu haqda AzadlıqRadiosuna vəkil Elton Quliyev məlumat verib.

Prokuror 3 ay həbs istəyib.

16:05 5.12.2014

Vəkil gəlib

Vəkil Elton Quliyev məhkəməyə gəlib. O, AzadlıqRadiosunun müxbirinə Xədicə İsmayılın həbsi ilə bağlı təqdimatın verilməsini təsdiqləsə də, əlavə heç nə deməyib.

15:45 5.12.2014

Tural Mustafayev adlı şəxsin işi üzrə çağrılıb

Dostlarının dediyinə görə, Xədicə İsmayıl dekabrın 5-də səhər saatlarında prokurorluğa çağrılıb. Burada prokuror onun həbsi barədə təqdimat verib. Təqdimata baxılması üçün jurnalist Səbail rayon Məhkəməsinə aparılıb.

Dostları onu da bildiriblər ki, X.İsmayıl prokurorluğa intihara cəhd göstərmiş Tural Mustafayev adlı şəxsin işi üzrə çağrılıb.

Məhkəmə vəkilin iştirakı olmadan davam edir.

Davamı