AB: "İstənilən həll yolunun davamlı olmasını təmin etmək lazımdır"
Avropa Birliyinin Ali komissarı və vitse-prezidenti Cozep Borellin Dağlıq Qarabağda hərbi əməliyyatların dayandırılması barədə bəyanatı yayılıb. AB-nin Bakıdakı nümayəndəliyinin yaydığı bəyanatda hərbi əməliyyatların dayandırılması alqışlanır.
"Bazar ertəsi günü Ermənistanla Azərbaycan arasında Rusiya vasitəçiliyi ilə razılaşdırılmış atəşkəs insan tələfatının qarşısını almağa kömək edəcək. Ümid edirəm ki, bu, məsələnin hərtərəfli şəkildə həll olunması yolunda ilk addımdır. İndi danışıqlar zamanı istənilən həll yolunun davamlı olmasını təmin etmək lazımdır. Avropa Birliyi ATƏT-in Minsk qrupu həmsədrlərinin rəhbərlik etdiyi formatı dəstəkləməyə davam edir, bu cəhdlərə və bütün Cənubi Qafqaz bölgəsinin dinc, firavan inkişafı üçün sazişlərin həyata keçirilməsinə töhfə verməyə hazırdır", – bəyanatda deyilir.
Fransa Türkiyəni sanksiyalarla hədələyir
Türkiyə Azərbaycan və Ermənistanın Dağlıq Qarabağda müharibənin dayandırılması haqda bəyanatını qəbul etməlidir. Əks halda Avropa Birliyi Ankaraya qarşı əlavə sanksiyalar tətbiq edə bilər. Bunu Fransanın Xarici İşlər naziri Jan İv Lö Drian parlamentdə çıxışında deyib.
Nazirin sözlərinə görə, Türkiyənin aqressiv davranışı dekabrda AB-nin növbəti samitində müzakirə olunacaq.
"AB-nin 27 üzvü artıq belə bir qərar qəbul edib ki, Türkiyə davranışını dəyişməsə, ona qarşı sanksiyalara qədər addımlar atılacaq, artıq bu variantlar masanın üzərindədir", – Lö Drian vurğulayıb.
Ərdoğan Rusiya ilə atəşkəs mərkəzinin razılaşdırıldığını bildirir
Türkiyə prezidenti Rəcəb Tayyib Ərdoğan deyir ki, noyabrın 11-də səhər Türkiyə və Rusiya atəşkəsə birgə nəzarət mərkəzi ilə bağlı razılaşma imzalayıblar. Onun sözlərinə görə, Türkiyə Qarabağda atəşkəsi monitorinq etmək üçün Rusiya ilə birlikdə həmin mərkəzdə işləyəcək.
Ərdoğan bunu hakim AKP-nin toplantısında bəyan edib. O, prezident İlham Əliyev başda olmaqla bütün azərbaycanlıları təbrik etdiyini, 28 illik işğalın bu razılaşma ilə başa çatdığını bildirib.
