Separatçı liderin sözçüsü: ‘Düşmən Stepanakertin astanasındadır...’
“Şuşa şəhəri tamamilə bizim nəzarətimizdən kənardadır”.
AzadlıqRadiosu Erməni xidmətinin məlumatına görə bunu Qarabağ separatçı rejimi liderinin mətbuat katibi Vaqram Poqosyan özünün Facebook səhifəsində yazıb.
O yazır ki, separatçı rejim başçısının bugün yazdığı məlumat “ictimai dairələrdə müəyyən ruh düşkünlüyü yaradıb”:
“Bu təbiidir, çünki müharibə nə uğurlara, nə də uğursuzluqlara təminat verməyən ağır mübarizə hərəkətidir. Bugünədək biz təəssüf ki, bizi silsilə uğursuzluqların izlədiyini etiraf etməliyik. Şuşa şəhəri tamamilə bizim nəzarətimzidən kənardadır. Hər cür mümkün ümidverici və ya ruhlandırıcı təbliğat tezisləri bizə reallıq hissinin itirilməsindən başqa heç nə vermir”.
AzadlıqRadiosu ilə söhbətində Poqosyan təsdiq edib ki, bu postu özü yazıb.
O habelə bildirib ki, Azərbaycan silahlı qüvvələri Xankəndinin astanasındadır:
“Bir daha kəmərlərimizi bərkitməliyik, çünki düşmən Stepanakertin astanasındadır. Paytaxtın varlığı təhlükə altındadır”.
Poqosyan daha sonra deyib:
“Biz Şuşanın yenidən bizim olmasını və Artsaxın (Dağlqı Qarabağın – red) saxlanmasını istəyiriksə, bütün imkanlarımızı Stepanakertin etibarlı müdafiəsinə və cəbhənin başqa istiqamətlərinə yönəltməliyik. Uğurun əsl və etibarlı qarantiyası məhz budur. Qələbəyə yalançı çağırışlar və Facebook-da şayiələr son nəticədə hər şeyin itirilməsinə gətirib çıxaracaq”.
Ermənistan Müdafiə Nazirliyi bu məlumatı hələki təsdiq etməyib.
"Azərbaycan ordusu 23 kəndi işğaldan azad edib"
Prezident İlham Əliyev bu gün, noyabrın 9-da Azərbaycan ordusunun 23 kəndi də işğaldan azad etdiyini açıqlayıb.
Bu barədə o, özünün Twitter hesabında yazıb: "Müzəffər Azərbaycan Ordusu Füzulinin Qobu Dilağarda, Yal Pirəhmədli, Yuxarı Yağlıvənd, Dilağarda, Seyid Mahmudlu, Ələsgərli, Xocalının Dəmirçilər, Çanaqçı, Mədətkənd, Sığnaq, Xocavəndin Susanlıq, Domi, Tuğ, Akaku, Azıx, Cəbrayılın Hüseynalılar, Söyüdlü, Aşağı Sirik, Qubadlının Yuxarı Mollu, Aşağı Mollu, Xocik, Zəngilanın Keçikli, Ördəkli kəndlərini işğaldan azad etmişdir...".
İlham Əliyev: 'Onlar vaxt itirirlər'
Prezident İlham Əliyev deyir ki, Azərbaycan qüvvələri Dağlıq Qarabağ münaqişəsini udur və Ermənistanın "kompromis imkanları daralır". Prezident bunları BBC televiziyasına müsahibəsində deyib.
Prezident həmçinin, Ermənistanın Baş naziri Nikol Paşinyanla sülh əldə etməyin mümkün olmadığını bəyan edib.